25. maí 2023 /
Innviðaráðuneytið

Nýr Suðurlandsvegur milli Hveragerðis og Selfoss opnaður formlega

Bergþóra Þorkelsdóttir, forstjóri Byggðastofnunar, og Sigurður Ingi Jóhannsson, innviðaráðherra, opnuðu Suðurlandsvega milli Hveragerðis og Selfoss.
Bergþóra Þorkelsdóttir, forstjóri Byggðastofnunar, og Sigurður Ingi Jóhannsson, innviðaráðherra, opnuðu Suðurlandsvega milli Hveragerðis og Selfoss.

Nýr Suðurlandsvegur milli Hveragerðis og Selfoss var opnaður formlega við hátíðlega athöfn í dag. Sigurður Ingi Jóhannsson, innviðaráðherra, og Bergþóra Þorkelsdóttir, forstjóri Vegagerðarinnar, klipptu á borða í tilefni af þessum merku tímamótum. Umferðaröryggi eykst til muna með þessari framkvæmd enda eru akstursstefnur nú aðskildar og vegamótum hefur fækkað úr rúmlega tuttugu í tvenn.

Verkinu í heild átti að ljúka í september 2023 samkvæmt útboði. Verkið er því nokkuð á undan áætlun. Þá var stór hluti verksins, nýtt hringtorg við Biskupstungnabraut og um fjögurra kílómetra kafli vegarins, tekinn í notkun í september á síðasta ári.

„Ég hef í ráðherratíð minni lagt sérstaka áherslu á að fækka einbreiðum brúm og vegamótum, stytta vegalengdir milli staða og síðast en ekki síst að aðskilja akstursstefnur á umferðarþyngstu vegunum til og frá höfuðborgarsvæðinu. Þessi vegarkafli milli Hveragerðis og Selfoss er einn af þeim fjölförnustu á landinu og því var framkvæmdin mjög tímabær. Það hefur sýnt sig og sannað að aðskilnaður akstursstefna eykur öryggi og bjargar mannslífum,“ sagði Sigurður Ingi í ávarpi í tilefni af opnuninni.

Nánar um verkið

Framkvæmdin nær um sveitarfélagið Ölfus og sveitarfélagið Árborg og skiptist í Hringveg (um 7,2 km), Ölfusveg (um 6,6 km), Þórustaðaveg (um 0,4 km) og Biskupstungnabraut (um 0,7 km). Öll umferð fyrir sveitirnar í kring færist yfir á nýjan Ölfusveg sem liggur samhliða Hringvegi.

Tvenn stór vegamót eru í framkvæmdinni, hringtorg við Biskupstungnabraut og nýjan Hringveg og svo hliðfærð T-vegamót á Hringvegi við Hvammsveg eystri og Kirkjuferjuveg. Fimm steyptar brýr og undirgöng ásamt tvennum reiðgöngum úr stáli teljast einnig til framkvæmdanna. Að auki voru gerðar miklar breytingar á lagnakerfum veitufyrirtækja.

Þá var fyrsta skrefið stigið að snjallvæddum vegi á Íslandi en í þessu verki var í fyrsta sinn lagt fyrir ljósleiðara meðfram vegi. Það getur haft mikla þýðingu fyrir umferðaröryggi og fjarskiptaöryggi.

Var efnið hjálplegt?