23. október 2024 /
Menningar-٫ nýsköpunar- og háskólaráðuneytið

Carbfix hlýtur Nýsköpunarverðlaun Íslands árið 2024​

Áslaug ARna Sigurbjörnsdóttir, ráðherra nýsköpunarmála, og fulltrúar Carbfix við afhendingu Nýsköpunarverðlauna Íslands 2024.
Áslaug ARna Sigurbjörnsdóttir, ráðherra nýsköpunarmála, og fulltrúar Carbfix við afhendingu Nýsköpunarverðlauna Íslands 2024.

Nýsköpunarfyrirtækið Carbfix er handhafi Nýsköpunarverðlauna Íslands 2024. Verðlaunin voru veitt á Nýsköpunarþingi sem fram fór í gær. Kári Helgason, forstöðumaður rannsókna og nýsköpunar, og Ragna Björk Bragadóttir, verkefnastýra styrkverkefna, tóku á móti verðlaununum fyrir hönd Carbfix en Áslaug Arna Sigurbjörnsdóttir, háskóla-, iðnaðar- og nýsköpunarráðherra, veitti verðlaunin. Nýsköpunarverðlaun Íslands hafa verið veitt árlega síðan árið 1994 til fyrirtækja sem þykja hafa skarað fram úr í þróun nýrrar vöru eða þjónustu, sem byggð er á rannsóknar- og nýsköpunarstarfi og náð hefur árangri á markaði.

Carbfix er íslenskt nýsköpunarfyrirtæki sem þróað hefur tækni til að binda koldíoxíð og brennisteinsvetni varanlega í bergi. Markmið fyrirtækisins er að vinna gegn loftslagsbreytingum með uppbyggingu öruggrar og þrautreyndrar tækni sem fjarlægt hefur nær 100 þúsund tonn af koldíoxíði. Ríflega 60 manns af þrettán þjóðernum starfa í dag hjá Carbfix sem er nú með samstarfsverkefni í yfir 20 löndum víðs vegar um heiminn.

Nánari upplýsingar um Carbfix og Nýsköpunarverðlaun Íslands má finna í fréttatilkynningu í vef Rannís.

Var efnið hjálplegt?